جالى تاج

حلو أوى موضوع التاج دة وبقالى كام يوم بقرا مواضيع مشابهة

صحيح الاسئلة تقليدية أوى بس الفكرة نفسها كويس خصوصا انه بيمر على الكل

طبعا أنا فرحت أوى لان أول مرة

وكمان جالى من حد مميز ومدونة بحبها

مزمز وكهفه المبهر

استنوا بقى هلبس التاج واقول على طول

إيه اللي هيحصل لإيميلك لما تموت؟
انا اصلا عندى 4 ايميلات
بس تعرف أن الموضوع دة كان على بالى و قالقنى وشاغل تفكيرى بجد عشان كدة كتبت فى وصييتى الاربع ايميلات بتوعى وبالباسوردات بتاعتهم والمدونة والمنتديات والباسوردات برده كله مكتوب فى الوصية
ووصيت انى لما أموت يعنى اى حد يعثر على الوصية ينفذ اللى فيها ويدخلى على ايميلاتى ويبعت للناس
المسجلة عليه انى مت عشان بس الناس تعرف وليهم حرية التصرف بعد كدة فيه لكن اهم حاجة ان مدونتى تبقى حاجة زى ذكرى البنى آدم بس اذا كان البنى آدم نفسه راح الحاجات دى هتفضل ليه
بس اهم حاجة يلاقوا الوصية بدرى قبل ماالايميل يتقفل

إديت الباسوورد لحد قبل كده؟ لو آه كانت ايه طبيعة علاقتك بيه ؟
آه مرتين مرة اديت لاختى ايميل من ايميلاتى عشان تدخل تكلمنى وانا على ايميلى التانى
ومرة لصديقة عزيزة اوى عشان لما كان الجهاز بتاعى عطلان قلتلها تفتحه عشان الرسايل ماتتمسحش بتعب نفسيا لما بتتمسح

اسمك؟
لازم يعنى اسمى ؟؟ خلاص هقول اهو
إسمى رشا
اسم الدلع المشهورة بيه وسط اصحابك؟
يوووووووه كتييييير تقريبا كل واحدة منهم بتدلعنى باسم فى شوشى وروشى وأوشة وروشة وإيشو
بس احبهم بالنسبة لى دلع بابا روشو لانها بتطلع منه عسل اوى ودلع اخويا الكبير
روش ورشروش
عمرك؟
ليه الاحراج دة طيب انت ماتعرفش ان عيب تسأل بنوتة أمورة زى سؤال زى دة
ومع ذلك هجاوبك برده انا مولودة فى 28 أكتوبر 1982 وكان يوم خميس على فكرة
وكان موافق 10 محرم احسبها انت بقى بمعرفتك

برجك؟
العقرب
برج العباقرة والمبدعين والفنانين ولاعيبة الكورة وكله يعنى وهو برج فى صفاته غامض واصلا مبنى على
اسطورة العنقاء عشان كدة تلاقى اصحاب البرج دة بيحبوا الظلام وقلبهم جامد ويحبوا الغموض والعالم المخيف
بيشبع نفسيتهم

مجال دراستك؟
انا خريجة كلية تجارة قسم محاسبة بس نفسى اغيره وادرس لغة عربية او فرنساوى لانى بحبه اوى
أو اكمل فيه وادرس ادارة اعمال انا مش راضية عن دراستى دى عامة رغم انى كنت بحبها بس قعدتنى فى البيت

شخصيتك نوعها إيه؟
أنا اللى اعرفه عن نفسى عامة انى شخصية خجولة طبيعتى الاساسية الانطوائية بس اتمردت على نفسى وبقيت
اجتماعية الى حد ما لكن ساعات الطبيعة بتغلب برده صريحة جدا ودايما ثايرة على كل حاجة حوالية متمردة
وعنيدة ودماغى ناشفة بس بحب النقاش الحر وبحترمه اوى ساعات نشفان الدماغ صحيح بيحكم بس مش دايما
بميل للتفكير والتأمل والوحدة شخصية انفاعلية هوائية مزاجية اصحابى وقرايبى بيقولوا انى محبوبة ومرحة
ودمى خفيف لانى دايما مش ببين اللى جوايا لايمانى بان ماحدش هيفهمنى غير نفسى
اكتر سمة باينة فى شخصيتى هى القوة يعنى اى حاجة تزعلنى بنفض ومن كتر مانفضت معتش فى حاجة تهم
مش عارفة هوصل فين بعد كدة ولاى هدف بفكر كدة يمكن اهم شىء عندى هو الحياة نفسها ممكن اكون كدة ويمكن دة السبب
حد فهم حاجة ؟؟

السفر بالنسبة لك؟
السفر دة حريتى وراحتى وانطلاقى شعورى بالحياة احساسى بانى مالكة الدنيا كلها السفر لاى مكان وكل مكان
عملية الانتقال نفسها وانا على سفر مافيش قيود مسلمة ايدى للريح وطايرة انا بعشق السفر

المود بتاعك؟
هقول تانى
مودى مزاجى هوائى انفعالى ممكن اتعكنن فى لحظة واكتئب وممكن ابقى سعيدة بعدها على طول
بس مش بسبب خارجى بسبب نفسى مع نفسى كدة الاسباب الخارجية أحيانا بتتكبت وتطلع بعدين
وقت فراغك بتعمل فيه إيه؟
انا حياتى مليانة عامة بالمهمات اليومية الضرورية للحياة رغم ان يومى كله فراغ وفاضى
بس مابلاقيش وقت اليوم بيطير مابين المطبخ والواجبات المنزلية اليومية السخيفة
وبين التليفزيون والكمبيوتر اللى له النصيب الاكبر فى حياتى متعتى فى القراية احب اقضى فيها وقت يكون بعيد عن الكمبيوتر لها متعة تانية غير القراية على الكمبيوتر
الأكلة المفضلة؟
بما إنى بطبخ فأنا بحب الأكلة اللى بحب أطبخها بحب المحشى لانى بعمله حلو أوى وبحب المكرونة خصوصا
الاسباجيتى مع بوفتيك أو فراخ بانيه أو كفتة وبطاطس مقلية معشوقتى الأولى والمكرونة بالبشاميل والجمبرى
وبعض انواع الاسماك وأى مشويات وبلاش السيرة دى عشان بعمل رجيم
الصفات اللي أخدتها من بابا؟والصفات اللي أخدتها من ماما؟
أنا خدت من بابا كتييييييير اوى انا كلى بابا
خدت شوية من دماغه وشوية من ذكائه وشوية من حبه للعلم والقراية والشعر وللغة العربية نفسها
وشوية من عنده ودماغه الناشفة وشوية من حزمه وشوية من قوة شخصيته وشوية من حنيته وعطائه وقسوته
فى نفس الوقت والقدرة على اتخاذ القرار والاحتواء
وحب الناس والبعد عنهم فى نفس الوقت وحب الوحدة وحب السهر
وحب الطيور وحب الحياة وعدم اليأس والالتزام وقوة نظرة العين وحزنها
ماما
أنا طبعا ماعشتش معاها كتير لانها توفت وعمرى 7 سنين بس من ذاكرتى المتواضعة وكلام اللى حواليا
انى خدت ملامحها وبعض من جمال روحها ومرحهاوحنيتها وشوية من قلبها الصافى وحبها للناس وحب المساعدة
والعطاء والصبر وقوة التحمل والبال الطويل والكتمان والوفاء والطيبة
أكتر ست حاجات بتكرهها؟
الغباء والتسلط واى قيود والكدب والخيانة والمكر والنفاق واللامبالاة وعدم الاحساس بالمسؤلية والضعف
ووالاستسلام واليأس والتشاؤم والنظام الحاكم بكل مؤسساته والتعصب لاى شىء والنقاش لمجرد النقاش
والفراق والوداع والقطط والكلاب بكرههم موووووووت ومصطفى الغندور دكتور المحاسبة فى كلية تجارة
جامعة المنصورة وبكره القهر والاذلال والتعنت والروتين رتبهم انت واختار الستة بمعرفتك
أكتر ست حاجات بتحبها؟
بحب السهر والليل بحزنه وسواده ووقت العصر وهواه فى ارض خضرا والغروب والشروق ونسمات الصبح
الباردة وبحب الصراحة والصدق والمعاناة والقوة وتحمل المسؤلية والتلقائية والعفوية والبساطة والحياة والحب
والعصافير والقراية خصوصا الشعر والقصص والفلسفة والموسيقى والقلم اللى بكتب بيه والورق والكتابة
وبحب الاطفال وخصوصا روان بنت اختى بنتى اللى ماخلفتهاش وبحب القهوة والاميرة ديانا وبحب كاظم الساهر
ومدرستى الابتدائية وأستاذة العربى فى الصف الخامس ابتدائى
الشغل بالنسبة لك؟
خروج الصبح ورجوع آخر النهار نظام يومى افتقده نوع من الحياة نفسى اعيشه نوع آخر من تحقيق الذات
القيمة للبنى آدم وليس وجود كعدمه بس لازم يبقى شغل بحبه والا يبقى نوع من الاذلال برده
الإنترنت بالنسبة لك؟
حيــــــــــــــــــــــــــــــــاتى أصلا مقدرش اعيش من غيره يجيلى اكتئاب النت بالنسبة لى هو بديل لشغلى
بفرغ فيه طاقاتى اللى مش عارفة اوديها فين ولأن مافيش حد بيسمعنى ولا بيقرا كتاباتى فالمتنفس الوحيد هو النت
كنت الاول فى المنتديات ودلوقتى بعد مااكتشفت عالم المدونات ازدادت ادمان للنت انا بعترف انى مدمنة نت
واوقات كتير ببقى عايزة ابعد عنه عشان بحس ان دة مش طبيعى بس مابقدرش برده لانه فعلا المتنفس الوحيد
وبلاقى فيه كل اللى مش بلاقيه فى حياتى بلاقى اصحاب وبلتقى بعقول تشبهنى وتفهمنى واهم حاجة ان فى حد
بيقرا اللى بكتبه وبيقدره وبينقده من غير اى مصلحة
الخمس حاجات اللي محدش يعرفها عنك؟
طب بذكائك انت لو مافيش حد يعرفها عنى هقولهالك انت يعنى وعلى العلن كدة
ماحدش يعرف انى من جوايا شايلة حزن كبير لانى بظهر العكس تماما
ماحدش يعرف انى فى الحقيقة بحب الوحدة مش بحب الناس الكل فاكر انى شخصية اجتماعية اوى
رغم ان الاجتماعية دى بتتعبنى وببذل مجهود كبير اوى عشان اتعامل عادى كدة بتلقائية

طبعا انا عارفة ان التاج دة لف على كل المدونات ومتهيألى مافيش حد ماعملوش
بس انا امرره الى هؤلاء اذا كانوا معملهوش
لابن بهية
وشادى صاحب حزب العواطلية نحن الاغلبية
وكينج توت
والزعيمة

عز صاحب بيت العز

الحصان الأسود

الساحر